ગણિત આધારિત ભારતની સૌથી મોટી ક્વિઝની ગ્રાન્ડ ફીનાલે: ૧૫૦૦ ઉપરાંત વિદ્યાર્થીઓ હાજર રહ્યા

• સ્ટેમ ક્વિઝ 2.0 સેમી ફાઈનલમાં વિદ્યાર્થીઓ ઝળહળ્યા

@Mohsin Dal Godhara

વિજ્ઞાન ટેકનોલોજી, એન્જીન્યરીંગ અને ગણિત આધારિત ભારતની સૌથી મોટી ક્વિઝની ગ્રાન્ડ ફીનાલેમાં ભાગ લેવા માટે દેશભરમાંથી ધો.૯ થી ૧૨ ના ૨૨ તેજસ્વી વિદ્યાર્થીઓ તા. ૩૦’ મે ૨૦૨૩ મંગળવારના રોજ ગુજરાત સાયન્સ સિટીમાં આવ્યા હતા. ગુજરાત સ્ટેમ ક્વિઝ: ધ જની ઓફ અ ન્યુ જનરેશનમાં કુલ રજીસ્ટ્રેશન અને ૫,૪૫,૭૬૪ વિદ્યાર્થીઓએ ભાગ લીધો હતો. જે પૈકી આશરે ૨૮ જેટલા રાજ્યો અને કેન્દ્ર શાસિત પ્રદેશના વિદ્યાર્થીઓની ગ્રાન્ડ ફિનાલે માટે પસંદગી કરવામાં આવી છે. ફાઈનલ રાઉન્ડમાં આશરે ૧૫૦૦ ઉપરાંત વિદ્યાર્થીઓ હાજર રહ્યા હતા.

અત્રે ઉલ્લેખનીય છે કે, પંચમહાલના ગોધરા, મોરવા હડફ, જાંબુઘોડા, કાલોલ, ઘોઘંબા, હાલોલ વગેરે તાલુકાઓમાંથી પણ વિદ્યાર્થીઓ પસંદગી પામેલા હતા. તેઓ પણ આ ક્વિઝમાં ભાગ લેવા માટે પહોંચ્યા હતા. સ્ટેમ ક્વિઝમાં રાજ્યના આરોગ્ય અને પરિવારના કલ્યાણ, ઉચ્ચ અને તકનિકી શિક્ષણ, કાયદો, ન્યાય અને વિધાનસભા અને સંસદીય બાબતોના મંત્રી રૂષિકેશ પટેલે મુખ્ય મહેમાન તરીકે હાજરી આપી હતી. તેજસ્વી વિદ્યાર્થીઓને ઇનામો અને પ્રમાણપત્રો આપી સન્માનિત કર્યા હતા. વિજ્ઞાન અને ટેકનોલોજી વિભાગના સચિવ વિજય નેહરા પણ આ કાર્યક્રમમાં વિશેષ અતિથી તરીકે ઉપસ્થિત રહ્યા હતા. સમગ્ર ગ્રાન્ડ ફિનાલે ક્વિઝનું સંચાલન વિનય આર. મુદ્લીયાર દ્વારા કરવામાં આવ્યું હતું.

જે માઈન્ડકોગ્સ, બેંગ્લોરમાં ધ માઈન્ડ ખાતે વ્યાવસાયિક ક્વિઝ માસ્ટર છે. ગ્રાન્ડ ફીનાલેમાં વિધાર્થીઓને તેમના મેડલ અને પ્રમાણપત્રો સાથે ટચ-સ્કીન લેપટોપ, ટેબલેટ, રોબો-કીટ્સ, ડ્રોન-કીટ્સ અને ટેલીસ્કોપ સહિત હાઈ-ટેક ઇનામો આપવામાં આવ્યા હતા. આ ઉપરાંત પસંદગી પામેલા વિદ્યાર્થીઓને દેશની ભારતીય અવકાશ સંશોધન સંસ્થા (ISRO), ભાભા એટોમેટિક રીસર્ચ સેન્ટર (BARC), સંરક્ષણ સંશોધન અને વિકાસ સંગઠન (DRDO), નેશનલ ફોરેન્સિક સાયન્સ યુનિવર્સીટી સહિત અગ્રણી વૈજ્ઞાનિક સંસ્થાઓની મુલાકાત પણ કરાવવામાં આવી છે. પંચમહાલ જિલ્લાના ગોધરા તાલુકાના નાલંદા સ્કુલના બે વિદ્યાર્થીઓ પ્રેમ તથા વૈભવ સેમી ફાઈનલ રાઉન્ડમાં વિજેતા થયા હતા અને પંચમહાલ જિલ્લાનું ગૌરવ વધાર્યું હતું. જ્યાં તેઓને પ્રોત્સાહીત સ્વરૂપે પ્રમાણ પત્ર અને રોબો કીટ આપી સન્માનિત કર્યા હતા. જિલ્લાનું ગૌરવ વધારવા બદલ લોક વિજ્ઞાન કેન્દ્રના કાર્યકારી પ્રમુખ ડૉ. સુજાત વલી દ્વારા બંને વિદ્યાર્થીઓને શુભેચ્છા પાઠવવામાં આવી હતી. આ કવીઝના અંતિમ રાઉન્ડમાં મહારાષ્ટ્ર અને ગોવા ની ટીમો વિજેતા બની હતી.